அழிந்த அயல்
கிழிந்த ஆடை
மெலிந்த தேகம்
இதயத்தில் குவிந்த சோகங்கள்
பொங்க மனமின்றி விம்மி
அழுகிறது ஒருஉறவு அங்கு
மாதாந்த கட்டணங்கள்
வீட்டில் நாளாந்த கண்டனங்கள்
மனசில் இறுக்கம்
எண்ணத்தில் சுருக்கம்
பொங்க மனமின்றி சும்மா
பொங்கி படைக்கிறது ஒரு உறவு இங்கு
கிழிந்த பணநோட்டாய்
ஒட்டிக் கொள்ளத் துடிக்கிறது இரு உறவுகளும்
ஆறுமுகம் வீதி ”பசில் வீதி” ஆனதால்
முள்ளிவாய்க்காலில் மூத்தமகன் இறந்ததனால்
களத்திற்கு போனமகளை காணவில்லை என்பதனால்
சின்னதாய் கூட பொங்க மனசில்லை அங்கு
பலருக்கு
சூரியன் கிழக்கில் எழவில்லை
பகிர்ந்துண்ண உறவில்லை
சக்கரை வாங்க மறந்ததனால்
சீனிப் பொங்கலானது பலர்வீட்டில் இங்கு
ரைஸ்குக்கரிலே பொங்கலாகி
குட்டி அறைக்குள்ளே படையலாகி
குளிர்சாதனப் பெட்டியிலே
குடிகொள்ளும் மாதக்கணக்காய் இங்கு
பட்டாசு வெடித்தாலும்
பயப்படும் சிறுபிள்ளை
பட்டகஸ்ரம் நினைவில்வந்து
பாடாய்படும் தாய்மனசு அங்கு
பெரியதாய் பொங்கியவன் கண்கள்
சிறியதாய் சுருங்கிக் கிடக்கிறது இங்கு
வலிதாய் இருந்த இனமொன்று
வலிதாங்க முடியாமல் தவிக்கிறது அங்கு
எண்திசையும் பெரிதாய் பொங்குகிறான்
தமிழன்
எண்ணத்தில் சின்னத்தனமாய் அலைகிறான்
தமிழன்
ஆணவத்தில் ஆடுகிறான் தமிழன்-அதைச்சொன்னால்
கோபத்தில் கோவணத்தை கிழிக்கிறான்
வந்த வழியை மறக்காதே தமிழா
சொந்த மொழியை
இழந்தாய் எனும் பழியை
ஏற்காதே தமிழா
இழந்தாய் எனும் பழியை
ஏற்காதே தமிழா
வாழ்க தமிழ்! வளரட்டும் தமிழர் திருநாள்
அனைவருக்கும் பொங்கல் வாழ்த்துக்கள்.
நன்றி
நட்புடன்,
அ.பகீரதன்
