மனச்சாட்சி

நோன்பிருக்கும் பெண்டிருக்கும்

மான்புமிகு தலைவருக்கும்

மனச்சாட்சி இல்லையென்றால்

மானிடத்தின் கதியென்ன?

எழுத்தாளன் பேனாவிற்கு

அழுத்தம் வந்தபோது

மனச்சாட்சி தோற்றுவிட்டால்

மானிடத்தின் கதியென்ன?

தொண்டனுக்கு பதவித்துண்டும்

தோழனுக்கு பணத்துண்டும்

அவசியமாய் ஆகிவிட்டால்

மானிடத்தின் கதியென்ன?

பச்சைக் கட்சியும்

வாக்குகளின் வாய்ப்புக்காய்

மரங்களை வெட்டிவிட்டால்

மானிடத்தின் கதியென்ன?

சீர்திருத்தும் சிறைக்குள்ளும்

ஆன்மீக அறைக்குள்ளும்

போதையும் போகமும் ஆகினால்

மானிடத்தின் கதியென்ன?

காந்திகளும் கத்தியெடுத்து

காமராஜர்களும் ஊழலாகி

அரிச்சந்திரர்களும் பொய்யானால்

மானிடத்தின் கதியென்ன?

விவசாயி தலைகளிலே

விலைவாசி சிலைகளாகி

உழைப்பாளி உறிஞ்சப்பட்டால்

மானிடத்தின் கதியென்ன?

 

சத்தியத்தை கைவிட்டு

சந்திரனில் கால்வைத்தும்

கருணையற்ற வளர்ச்சிகண்டால்

மானிடத்தின் கதியென்ன?

தொலைநோக்குத் தேவையாம்

தொலைத்தொடர்பு சேவையாம்

கொள்ளையரே முதலாளியானால்

மானிடத்தின் கதியென்ன?

ஆசிரியனின் பார்வையாலே

அந்தணனின் வேதத்தாலே

மாணவிக்கு களங்கம்வந்தால்

மானிடத்தின் கதியென்ன

தாய்போட்ட கணக்கினிலே

தாய்ப்பாலுக்கும் விலையிருந்தால்

தரணியிலே உயிர்வாழும்

மானிடத்தின் கதியென்ன?

 

மனச்சாட்சியை அடகுவைத்து

மானத்தை பறக்க விட்டு

மணிக்காக மணிக்கணக்காய் பணிசெய்தால்

மானிடத்தின் கதியென்ன?

மனச்சாட்சியை அடகு வையாதீர்

அதன் பெறுமதி அதிகம் என்பதற்காய்.......

நன்றி,

நட்புடன்,

அ.பகீரதன்

உயிருள்ள ரோஜா

உயிருள்ள ரோஜா ஒன்று-என்

உயிருக்குள் வீழ்ந்தாள் இன்று

அழகாலே மனசை வென்று-என்

உலகாக நின்றாள் இன்று

எல்லாமே அவளானாள்- எனக்கு

எப்போதும் தாயானாள்

உயிருக்குள் நிலையானாள்-என்

உண்மைக்கு விலையானாள்

கன்னத்தின் குழியாக-என்

எண்ணெத்தில் சுழியானாள்

காதலின் குறியீடாய்-என்

வாழ்விற்கு குறியானாள்

திறந்த மனசுடன் வாடி-உன்

பிறந்த மேனியை தாடி

ஆழ்ந்து உறங்கநான் ரெடி-நம்

ஆசை இறங்கலாம் கோடி

வாழ்க்கையொரு பொற்குகை-அங்கு

காதல்மட்டுமே இயற்கை

கட்டியணைக்கலாம் வாடி–நம்

கட்டில்உடையலாம் வாநீ

இளமையொரு சொர்க்கம்-அங்குகாதல்

இல்லை என்பதே இல்லை

காதலென்பது இறைவன் தந்தது-அது

கடைசிவரைக்கும் உயிர்ப்பு தந்தது

போதை என்றால் என்ன-நீ போகும்

பாதை தான் பெண்ணே

மேதை என்றால் என்ன-வாழ்வில்

உன்காதல் தான் பெண்ணே

கடவுள் என்றால் என்ன-உன்

கனவு தான் பெண்ணே

இறைவன் என்றால் என்ன-நான்

இறக்கும்வரைக்கும் நீதான் பெண்ணே

அறிந்து கொள்ளடி பெண்ணே-உனக்காய்

அழிந்து போகவும்நான் ரெடி

மூச்சாய் இழுக்கிறேன் உன்னை-என்

முழு உலகமும் நீதான் பெண்ணே

 

உங்கள் நேரத்திற்கு நன்றி.

நட்புடன்,

அ.பகீரதன்

பயம் கொள்

அச்சம் என்பது

ஆண்மையில்லை கற்புமில்லை

ஆனாலும் கொஞ்சம் பயம்கொள்

தாயின்

தண்டனைக்கு பயப்படாதே

அன்புக்கு பயம்கொள்

மனைவியின்

கண்ணீருக்கு பயப்படாதே

கருணைக்கு பயம்கொள்

கணவனின்

கண்டிப்புக்கு பயப்படாதே

காதலுக்கு பயம்கொள்

தந்தையின்

கோலுக்கு பயப்படாதே

நாவுக்கு பயம்கொள்

குருவின்

போதனைக்கு பயப்படாதே

திறமைக்கு பயம்கொள்

நண்பனின்

பிரிவிற்கு பயப்படாதே

நட்புக்கு பயம்கொள்

 

காதலின்

முடிவிற்காய் பயப்படாதே

காதலுக்கு பயப்படு

ஆண்டவனின்

விதிமுறைக்கு பயப்படாதே

அறத்திற்கு பயம்கொள்

அறியாமையின்

மூடநம்பிக்கைக்கு பயப்படாதே

அறிவியலுக்கு பயம்கொள்

முதலாளியின்

பணத்திற்கு பயப்படாதே

கடமைக்கு பயம்கொள்

அதிகார வர்க்கத்தின்

சூழ்ச்சிகளிற்கு பயப்படாதே

சாணக்கியத்திற்கு பயம்கொள்

கனடாவின்

குளிருக்கு பயப்படாதே

குறளுக்கு பயம்கொள்

நாட்டின்

காவற்துறைக்கு பயப்படாதே

சட்டத்திற்கு பயம்கொள்

பணத்தின்

வலிமைக்கு பயப்படாதே

கடன்பட பயம்கொள்

வாழ்வின்

தோல்விகளிற்கு பயப்படாதே

தேவைகளிற்கு பயப்படு

சமூகத்தின்

ஏளனத்திற்கு பயப்படாதே

கேள்விகளிற்கு பயம்கொள்

நோயின்

அறிகுறிக்கு பயப்படாதே

வைத்தியருக்கு பயம்கொள்

முதுமையின்

வருகைக்கு பயப்படாதே

ஆரோக்கியத்திற்கு பயம்கொள்

யமனின்

கயிற்றுக்கு பயப்படாதே

உண்மைக்கு பயம்கொள்

நீ

வாழவும் பயப்படாதே

சாகவும் பயப்படாதே

நட்புடன்,

அ.பகீரதன்