கவிதைகள்

அள்ளிக்குவித்த எருக்கூட

ஐம்பதுரூபாய் நோட்டானது

எழுதிக்குவித்த கவியெல்லாம்

இன்று என்னானது?

சலிக்காது எழுதியகவியெல்லாம்

சல்லிக்காசு ஈட்டவில்லை

மல்லிகாக்கு எழுதியகவியை

சொல்லிக்க யாருமில்லை

விசார மனசுகொண்டு

வீணான கனவுகண்டு

வீணாவுக்கு வடித்தகவியெல்லாம்

வீணான கதையாரறிவார்?

காசி பிறந்தமண்ணில்

கவிஎழுத நாதியில்லை

புதுவை பூத்தமண்ணில்

எதுகை மோனையில்லை

பாரதியின் கவிதைகளை

பாதியிலே தூங்கவிட்டு

வாலியின் வரிகளிலே

ஜாலியாய் தூங்குவதோ?

மானிடம் வளர்த்த

கவியின்று-சினி

மாவிடம் கிடக்குதே

சிக்குண்டு

காதற் கவிபாடும்

பிழைப்புக் கவிஞனுக்கு

உழைக்கும்வழி தெரிகிறது-ஏனோ

உழைப்பின்வலி புரிவதில்லை

கழிவறை கழுவும் கடைநிலை பெண்ணுக்கும்

கருவறை தந்த அன்னையின் மண்ணுக்கும்

கல்லறை துயிலும் கார்த்திகைப் பூவிற்கும்

கற்றறிவாலே நற்கவிபாட வரமொன்று தாமுருகா
 

குறிதவறா கோலொன்று தாமுருகா

நெறிபிறழா வாழ்வொன்று தாமுருகா

வெறிகுறையா வேகமும் தாமுருகா

பார்புகழ படிப்பவர்நாபுகழ பாவொன்றுதாமுருகா

அன்பின் வழியொழுகி அதுவேமுடிவாகி

அனைத்தையும் நேசிக்கும் ஆளுமைதாமுருகா

உனையேநாடி என்இருப்பைத்தேடி முடிகண்டு

காலமெல்லாம் காதல்செய வரமொன்றுதாமுருகா

 

அ.பகீரதன்