விதைப்பை சிறைப்பை யானதால்
விந்தை உயிர்ப்பாய் விடுவித்தேன்
கருப்பை சிறைப்பை யானதால்
பிறப்பை சிறப்பாய் வருவித்தேன்
தாயின் மடியணை சிறையானதால்
தரையில் பாதம் பதித்தேன்
தந்தையின் கைப்பிடி சிறையானதால்
சிந்தையில் தனிவழி நடந்தேன்
வீடே பெரும் சிறையானதால்
வீதியில் விழிகளை தரித்தேன்
வீதியில் விதிகள் சிறையானதால்
விதிமீறி சிறகினை விரித்தேன்
கல்வியில் பாடங்கள் சிறையானதால்
பள்ளியில் பெருவிடு முறையானேன்
குருவின் போதனை சிறையானதால்
குருகுல வாழ்வைத் துறந்தேன்
தனிமையின் பிடியில் சிறையானதால்
காதலின் கனிவில் கசிந்தேன்
கனவின் பிடியில் சிறையானதால்
காதலை கணவனாய் இணைத்தேன்
கணவனும் ஒருவகைச் சிறையானதால்
காலமும் தனிக்கைதியாய் வாழ்ந்தேன்
கட்டிலும் ஆதிக்க சிறையானதால்
கட்டி அணைக்கவும் தவிர்த்தேன்
வேரும் கிளையும் சிறையானதால்
விழுதுகள் தாங்கி நிமிர்ந்தேன்
விழுதுகள் தனிச் சிறையானதால்
முதுமையை மனதினில் உணர்ந்தேன்
இளமை காலத்தின் சிறையானதால்
மூப்பினை வாழ்வில் அடைந்தேன்
மூப்பும் இயலாமையின் சிறையானதால்
மரணத்தில் நான் விழுந்தேன்.
உங்கள் நேரத்திற்கு நன்றி,
அன்புடன்,
அ.பகீரதன்
No comments:
Post a Comment